ಶ್ರೀಮಂಗಲ : ಕಾಳಿಮಾಡ ಕುಟುಂಬದಿಂದ ಕೊಡವ ಕೌಟುಂಬಿಕ ಪ್ರಥಮ “ಮಂಗಲ ಸಮ್ಮಂಧ ಆಡಕುವ ನಮ್ಮೆ ” ಗೆ ವಿಜೃಂಭಣೆಯ ಚಾಲನೆ ದೊರೆಯಿತು. ಪೊನ್ನಂಪೇಟೆಯ ಶ್ರೀ ರಾಮಕೃಷ್ಣ ಆಶ್ರಮದಿಂದ ಪೊನ್ನoಪೇಟೆ ಕೊಡವ ಸಮಾಜದ ವರೆಗೆ ಕಾಳಿಮಾಡ ಕುಟುಂಬದಿಂದ ಸಾಂಪ್ರದಾಯಿಕ ಉಡುಪಿನಲ್ಲಿ ಸಾಂಸ್ಕೃತಿಕ ಮೆರವಣಿಗೆ ಆಕರ್ಷಕವಾಗಿತ್ತು. ಮೆರವಣಿಗೆಯನ್ನು ಕಾಳಿಮಾಡ ಕುಟುಂಬದ ಅಧ್ಯಕ್ಷ ಕಾಳಿಮಾಡ ಎಂ. ಮೋಟಯ್ಯ ಅವರು ಕೋವಿಯಲ್ಲಿ ಗುಂಡು ಹಾರಿಸುವ ಮೂಲಕ ಉದ್ಘಾಟಿಸಿದರು.

ಪೈಪೋಟಿಯನ್ನು ಕೊಡವ ಜಾನಪದ ತಜ್ಞ ಬಾಚಣಿಯಂಡ ಅಪ್ಪಣ್ಣ ಅವರು ಉದ್ಘಾಟನೆ ಮಾಡಿ ಮಾತನಾಡಿ, ಹೊಸ ವಿಷಯದಲ್ಲಿ ಇಂತಹ ಕಾರ್ಯಕ್ರಮ ಆಯೋಜನೆ ಮಾಡಿರುವುದು ಕೊಡವ ಪದ್ಧತಿ ಹಾಗೂ ಪರಂಪರೆ ಬೆಳವಣಿಗೆಗೆ ಹೆಚ್ಚಿನ ಮಹತ್ವ ನೀಡಿದಂತಾಗಿದೆ, ಇಂತಹ ಕಾರ್ಯಕ್ರಮ ಅರ್ಥಪೂರ್ಣವಾಗಿದೆ. ನಮ್ಮ ಮಕ್ಕಳಿಗೆ ಇಂತಹ ಪದ್ದತಿಯ ಮಹತ್ವದ ಬಗ್ಗೆ ತಿಳಿಸಿ ಕೊಟ್ಟಾಗ ಮಾತ್ರ ಅದನ್ನು ಅವರು ಕಲಿಯುತ್ತಾರೆ. ಭಾಷೆ ಹಾಗೂ ಸಂಸ್ಕೃತಿಯನ್ನು ನಾಶ ಮಾಡಿದರೆ ಆ ಜನಾಂಗವೇ ನಾಶವಾಗುತ್ತದೆ. ಹಳೆಯ ಪದ್ಧತಿ ಪರಂಪರೆ ಕ್ಷೀಣವಾಗುತ್ತಿರುವುದನ್ನು ಅರಿತು ಕೊಡವ ಜನಾಂಗದ ಮದುವೆಯಲ್ಲಿ ಜಾನಪದ ರೂಪದಲ್ಲಿರುವ ಒಪ್ಪಂದವನ್ನು ಎಲ್ಲರೂ ಕಲಿಯುವಂತಾಗ ಬೇಕೆಂಬ ನಿಟ್ಟಿನಲ್ಲಿ ಕಾಳಿಮಾಡ ಕುಟುಂಬಸ್ಥರು ಸಂಸ್ಕೃತಿಯ ಬೆಳವಣಿಗೆಗೆ ಉತ್ತೇಜನಕ್ಕೆ ಮುಂದಾಗಿರುವುದು ತುಂಬಾ ಪ್ರಸಂಶನೀಯ ಎಂದು ಹೇಳಿದರು.

ಕಾರ್ಯಕ್ರಮದ ಮುಖ್ಯ ಅತಿಥಿ ಮುಖ್ಯಮಂತ್ರಿಗಳ ರಾಜಕೀಯ ಕಾರ್ಯದರ್ಶಿಗಳು ಹಾಗೂ ಶಾಸಕ ಅಜ್ಜಿಕುಟ್ಟಿರ ಎಸ್ ಪೊನ್ನಣ್ಣ ಅವರು ಮಾತನಾಡಿ ಭಾಷೆ ಮತ್ತು ಸಂಸ್ಕೃತಿ ಉಳಿದರೆ ಜನಾಂಗ ಉಳಿಯುತ್ತದೆ. ಇಂದು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಜನಸಂಖ್ಯೆ ತುಂಬಾ ಮುಖ್ಯವಾಗಿದೆ. ಕೊಡವ ಜನಾಂಗವು ಚಿಕ್ಕದಾಗಿದ್ದರೂ ಕೆಲವು ಜನರು ವಿವಿಧ ಕ್ಷೇತ್ರದಲ್ಲಿ ಸಾಧನೆ ಮಾಡಿದ್ದರಿಂದ ದೇಶ ವಿದೇಶಗಳಲ್ಲಿ ಕೊಡವರನ್ನು ಗುರುತಿಸುವಂತಾಗಿದೆ. ಈ ಮೂಲಕ ನಮ್ಮ ಸಂಸ್ಕೃತಿ ಪದ್ಧತಿ, ದೇಶ ವಿದೇಶಕ್ಕೆ ಸಾರಿದ್ದು ನಮಗೆ ಹೆಮ್ಮೆಯ ವಿಚಾರವಾಗಿದೆ. ನಮ್ಮ ಸಂಸ್ಕೃತಿಯನ್ನು ವ್ಯವಸ್ಥಿತವಾಗಿ ರಕ್ಷಿಸಿಕೊಳ್ಳದಿದ್ದರೆ ಉಳಿಸಿಕೊಳ್ಳಲು ಸಾಧ್ಯವಿಲ್ಲ.ನಮ್ಮ ಭಾಷೆಯನ್ನು ಸಹ ಚೆನ್ನಾಗಿ ಹಿಡಿತ ದೊಂದಿಗೆ ಮಾತನಾಡುವುದು ಬರೆಯುವುದನ್ನು  ಕಲಿಯಬೇಕಾಗಿದೆ. ಕೊಡವ ಸಂಸ್ಕೃತಿ ಹಾಗೂ ಬಾಷೆಯನ್ನು ಉಳಿಸಿಕೊಳ್ಳುವುದು ನಮ್ಮ ಕೈಯಲ್ಲಿ ಇದೆ ಎಂದು ಹೇಳಿದ ಅವರು ನಾಲ್ಕು ಕೋಟಿಗಿಂತ ಹೆಚ್ಚು ಜನರು ಮಾತನಾಡುವ ಕನ್ನಡ ಭಾಷೆ ಮುಂದಿನ 30- 40 ವರ್ಷದಲ್ಲಿ ಇಲ್ಲದಾಗುತ್ತದೆ ಎಂದು ಯುನೆಸ್ಕೋ ವರದಿ ಎಚ್ಚರಿಸಿದೆ. ಕೊಡವ ಭಾಷೆ ಮಾತನಾಡುವವರ ಸಂಖ್ಯೆ ಮತ್ತಷ್ಟು ಕಡಿಮೆ ಇದ್ದು, ಕನ್ನಡ ಮತ್ತು ಕೊಡವ ಭಾಷೆ ಮಾತನಾಡುವವರು ಎಚ್ಚೆತ್ತುಕೊಳ್ಳಬೇಕಾಗಿದೆ. ಅದರಿಂದ ಭಾಷೆ ಸಂಸ್ಕೃತಿಯ ಮೇಲೆ ಗಮನಕೊಟ್ಟು ರಕ್ಷಣೆ ಮಾಡಿದಾಗ ಮಾತ್ರ ಜನಾಂಗ ಉಳಿಯುತ್ತದೆ ಎಂದು ಅವರು ಹೇಳಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಕಾಳಿಮಾಡ ಕುಟುಂಬದ ಅಧ್ಯಕ್ಷ ಕಾಳಿಮಾಡ ಎಂ.ಮೋಟಯ್ಯ ಅವರು ಕೊಡವ ಜನಾಂಗದಲ್ಲಿ ವಿವಿಧ ಕ್ರೀಡಾ ಟೂರ್ನಮೆಂಟ್ ಗಳನ್ನು ಮಾಡಲಾಗುತ್ತಿದೆ. ಇವುಗಳಿಂದ ಕ್ರೀಡೆಯ ಬೆಳವಣಿಗೆಗೆ ಸಹಕಾರ ಆಗುತ್ತದೆ. ಆದರೆ ಕೊಡವ ಸಂಸ್ಕೃತಿಗೆ ಉತ್ತೇಜನ ನೀಡಬೇಕೆಂಬ ಉದ್ದೇಶದಿಂದ “ಮಂಗಲ ಸಮ್ಮಂಧ ಆಡುಕುವ ” ನಮ್ಮೆಯನ್ನು ಆಯೋಜಿಸಲಾಗಿದೆ. ಕೊಡವ ಜನಾಂಗದಲ್ಲಿ ಸಮ್ಮಂಧ ಅಡುಕುವ ಪದ್ಧತಿ ಮದುವೆಯಲ್ಲಿ ತುಂಬಾ ಮಹತ್ವ ಪಡೆದಿದ್ದು ಅಲಿಖಿತ ಜಾನಪದ ರೂಪದಲ್ಲಿರುವ ಇಂತಹ ಪದ್ಧತಿ ಇತ್ತೀಚೆಗೆ ಕ್ಷೀಣವಾಗುತ್ತಿದ್ದು, ಇದನ್ನು ಗಮನಿಸಿ ಪ್ರತಿ ಮದುವೆಯಲ್ಲಿ ಸರಿಯಾದ ರೀತಿಯಲ್ಲಿ ಈ ಪದ್ಧತಿ ನಡೆಸುವಂತಾಗಬೇಕು ಎಂಬ ಉದ್ದೇಶದಿಂದ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ. ಇದು ಸ್ಪರ್ಧೆ ಅಲ್ಲ, ಬದಲಿಗೆ ಕೊಡವ ಸಂಸ್ಕೃತಿಯನ್ನು ಬೆಳೆಸುವ ಹಬ್ಬವಾಗಿದೆ ಎಂದು ಹೇಳಿದರು.

ವೇದಿಕೆಯಲ್ಲಿ ಕುಟುಂಬದ ಗೌ. ಕಾರ್ಯದರ್ಶಿ ಕಾಳಿಮಾಡ ರಶಿಕ್ ಕಾವೇರಪ್ಪ, ಸಂಚಾಲಕ ಕಾಳಿಮಾಡ ಪದ್ಮ ಬೆಳ್ಯಪ್ಪ, ಹಾಗೂ ತೀರ್ಪುಗಾರರಾದ ಬೊಟ್ಟೋಳಂಡ ಪೊನ್ನಣ್ಣ, ಬೊಳ್ಳೇರ ಪ್ರಥ್ವಿ, ನೆಲ್ಲಮಾಡ ರಾಜ ತಿಮ್ಮಯ್ಯ, ಕರ್ತಮಾಡ ಹರೀಶ್, ಬೊಳ್ಳಿಮಾಡ ಧನು ದೇವಯ್ಯ ಉಪಸ್ಥಿತರಿದ್ದರು

ಸಮಾರೋಪ ಕಾರ್ಯಕ್ರಮ :
ಕಾರ್ಯಕ್ರಮದಲ್ಲಿ 32 ತಂಡಗಳು ಪಾಲ್ಗೊಂಡಿದ್ದವು.
ಪ್ರಥಮ ಬಹುಮಾನವನ್ನು ಆಳಮೇoಗಡ, ದ್ವಿತೀಯ ಬಹುಮಾನವನ್ನು ಚೆಟ್ಟಿಯಾರಂಡ ಹಾಗೂ ತೃತೀಯ ಬಹುಮಾನವನ್ನು ತೀತಿಮಾಡ ಕುಟುಂಬ ತಂಡಗಳು ಪಡೆಯಿತು. ಭಾಗವಹಿಸಿದ ಎಲ್ಲಾ ತಂಡಗಳಿಗೆ ಕಿರು ಕಾಣಿಕೆ ನೀಡಲಾಯಿತು. ಸಮಾರೋಪ ಸಮಾರಂಭದಲ್ಲಿ ವಿವಿಧ ಕೊಡುವ ಸಂಸ್ಕೃತಿಕ ಕಾರ್ಯಕ್ರಮಗಳು ನೃತ್ಯಗಳು ಕಲಾವಿದರಿಂದ ಹಾಡುಗಾರಿಕೆ ನಡೆಯಿತು. ಸಮಾರೋಪ ಸಮಾರಂಭದಲ್ಲಿ ಕುಟುಂಬದ ಹಿರಿಯರಾದ ಕಾಳಪ್ಪ, ಶಿವಪ್ಪ,ರಾಣಾ, ಪಾಪುಣಿ, ಗಣೇಶ್, ಪಾರ್ವತಿ,ರಾಮು ಕಾಳಪ್ಪ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಡಾ.ಕಾಳಿಮಾಡ ಶಿವಪ್ಪ ಪ್ರಾರ್ಥಿಸಿ, ರೇಷ್ಮಾಪೂಣಚ್ಚ ಮತ್ತು ಸೀಮಾ ಪ್ರಶಾಂತ್ ನಿರೂಪಿಸಿದರು. ಕುಟುಂಬದ ಅಧ್ಯಕ್ಷ ಮೋಟಯ್ಯ ಸ್ವಾಗತಿಸಿ ಕಾರ್ಯದರ್ಶಿ ರಶೀಕ್ ಕಾವೇರಪ್ಪ ವಂದಿಸಿದರು.

ವಿರಾಜಪೇಟೆ: ಚೆಂಬು ಗ್ರಾಮದ ಬಿಜೆಪಿ ಕಾರ್ಯಕರ್ತರು ಮತ್ತು ಪ್ರಮುಖರು ಇಂದು ಶಾಸಕರು ಹಾಗೂ ಮುಖ್ಯಮಂತ್ರಿಗಳ ರಾಜಕೀಯ ಕಾರ್ಯದರ್ಶಿಗಳಾದ ಶ್ರೀ ಅಜ್ಜಿಕುಟ್ಟಿರ ಎಸ್. ಪೊನ್ನಣ್ಣ ಅವರ ಸಮ್ಮುಖದಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಗೊಂಡರು. ಬಿಜೆಪಿಯ ಪ್ರಮುಖ ನಾಯಕ ಹಾಗೂ ಮಾಜಿ ಗ್ರಾಮ ಪಂಚಾಯತ್ ಸದಸ್ಯ ರಮೇಶ್ ನಂಬಿಯಾರ್, ನಾಯರಗದ್ದೆ ಲೋಲಾಕ್ಷ, ಕೂಗಲೆ ಗೋಪಾಲಕೃಷ್ಣ ಹಾಗೂ ನಿವೃತ್ತ ಅರಣ್ಯ ಅಧಿಕಾರಿ ಬಾಲೆಂಬಿ ರಾಮಚಂದ್ರ ಅವರು ಶಾಸಕ ಎ.ಎಸ್. ಪೊನ್ನಣ್ಣ ಅವರ ಜನಪರ ಕಾಳಜಿ, ಅಭಿವೃದ್ಧಿ ಕೆಲಸಗಳು ಹಾಗೂ ಸಾಮಾಜಿಕ ಚಿಂತನೆಯನ್ನು ಮೆಚ್ಚಿ ಅಧಿಕೃತವಾಗಿ ಕಾಂಗ್ರೆಸ್ ಸೇರ್ಪಡೆಗೊಂಡರು.

ಎಲ್ಲರನ್ನು ಶಾಸಕರು ಪಕ್ಷದ ಶಾಲು ಹೊದಿಸುವ ಮೂಲಕ ಪಕ್ಷಕ್ಕೆ ಬರಮಾಡಿಕೊಂಡು ಶುಭ ಕೋರಿದರು.ಶಾಸಕರ ವಿರಾಜಪೇಟೆ ಗೃಹ ಕಚೇರಿಯಲ್ಲಿ ನಡೆದ ಈ ಸೇರ್ಪಡೆ ಕಾರ್ಯಕ್ರಮದಲ್ಲಿ ಬ್ಲಾಕ್ ಕಾಂಗ್ರೆಸ್ ಕಾರ್ಯಾಧ್ಯಕ್ಷ ಶೌಕತ್ ಅಲಿ, ವಲಯ ಕಾಂಗ್ರೆಸ್ ಅಧ್ಯಕ್ಷ ರವಿರಾಜ್ ಹೊಸೂರು, ಸಾಮಾಜಿಕ ಜಾಲತಾಣ ಜಿಲ್ಲಾಧ್ಯಕ್ಷ ಸೂರಜ್ ಹೊಸೂರು, ಜಿಲ್ಲಾ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಹನೀಫ್, ನಿಕಟಪೂರ್ವ ಬ್ಲಾಕ್ ಅಧ್ಯಕ್ಷ ಇಸ್ಮಾಯಿಲ್, ಹಿರಿಯ ನಾಯಕ ಸೋಮಣ್ಣ ಬಾಲಂಬಿ, ಬೂತ್ ಅಧ್ಯಕ್ಷರುಗಳಾದ ಚನ್ನಪ್ಪ ನಡುಬೆಟ್ಟು, ಪಕೀರ ಮಂಗಳಪಾರೆ, ನವೀನ ರಾಮಕಜ, ಗ್ರಾ.ಪಂ ಮಾಜಿ ಉಪಾಧ್ಯಕ್ಷೆ ಶಶಿಕಲಾ ಕಟ್ಟೆಪಾರೆ, ನಾಪೋಕ್ಲು ಬ್ಲಾಕ್ ಸಮಿತಿ ಪದಾಧಿಕಾರಿ ಭುವನೇಶ್ವರ ಕೊಪ್ಪದ, ಯುವ ಕಾಂಗ್ರೆಸ್ನ ಜಯಪ್ರಕಾಶ್ ಪನ್ನೇಡ್ಕ, ರೋಹಿತ್ ಪನ್ನೇಡ್ಕ, ರಶೀದ್ ಬಾಲಂಬಿ, ಚೆನಿಯಪ್ಪ ಕಟ್ಟೆಪಾರೆ, ಪುರುಷೋತ್ತಮ ಕಟ್ಟೆಪ್ಪಾರೆ, ರಘುನಾಥ್ ಬಾಲಂಬಿ, ಶಿವರಾಮ ಕೊಪ್ಪದ, ಪೆತ್ತಾಜೆ ಸೂರ್ಯ ಮತ್ತು ವಲಯದ ಪ್ರಮುಖರು ಉಪಸ್ಥಿತರಿದ್ದರು.

ಮಡಿಕೇರಿ :  ಮಹದೇವಪೇಟೆಯ ಪಂಪಿನಕೆರೆಯಲ್ಲಿ ಭಾನುವಾರ ನಗರದ ಶಕ್ತಿ ದೇವತೆಗಳ ಕರಗಗಳಿಗೆ ಪೂಜೆ ಸಲ್ಲಿಸುವ ಮೂಲಕ ಐತಿಹಾಸಿಕ ಮಡಿಕೇರಿ ದಸರಾಗೆ ಚಾಲನೆ ದೊರೆಯಿತು.
ನಾಲ್ಕು ಶಕ್ತಿ ದೇವತೆಗಳಿಗೆ ವಿಶೇಷ ಪೂಜೆ ಸಲ್ಲಿಸುವ ಮೂಲಕ ಮಡಿಕೇರಿ ದಸರಾಗೆ ಕೊಡಗು ಜಿಲ್ಲಾ ಉಸ್ತುವಾರಿ ಸಚಿವರಾದ ಪಿ.ಎಂ.ನರೇಂದ್ರ ಸ್ವಾಮಿ ಅವರು ಚಾಲನೆ ನೀಡಿದರು.

ನಗರದ ಶಕ್ತಿ ದೇವತೆಗಳಾದ ಕುಂದೂರು ಮೊಟ್ಟೆ ಚೌಟಿ ಮಾರಿಯಮ್ಮ, ಕಂಚಿ ಕಾಮಾಕ್ಷಿಯಮ್ಮ, ದಂಡಿನ ಮರಿಯಮ್ಮ ಹಾಗೂ ಕೋಟೆ ಮಾರಿಯಮ್ಮ ದೇವಾಲಯಗಳ ಕರಗ ಪುಷ್ಪಾಲಂಕೃತವಾಗಿ, ಭಕ್ತರ ಜಯಘೋಷದೊಂದಿಗೆ ಮರೆವಣಿಗೆ ಆರಂಭವಾಯಿತು. ಪೂಜೆ ಸಲ್ಲಿಕೆ ಬಳಿಕ ನಾಲ್ಕು ದೇವತೆಗಳ ಕರಗಗಳು ಮೆರವಣಿಗೆ ಹೊರಟವು.

ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಸಾಗುತ್ತಿದ್ದಂತೆ ಭಕ್ತರು ಪೂಜೆ ಸಲ್ಲಿಸಿ ಭಕ್ತಿ ಭಾವ ಮೆರೆದರು. ಪೂಜೆಯ ನಂತರ ಆರಂಭವಾದ ಕರಗಗಳು ನಗರ ಪ್ರದಕ್ಷಿಣೆ ಇನ್ನು 9 ದಿನಗಳ ಕಾಲ ಮುಂದುವರಿಯಲಿದೆ.

ಕುಂದೂರುಮೊಟ್ಟೆ ಚೌಟಿ ಮಾರಿಯಮ್ಮ ದೇವಾಲಯದಿಂದ ಪಿ.ಪಿ. ಚಾಮಿ, ದಂಡಿನ ಮಾರಿಯಮ್ಮ ದೇವಾಲಯದಿಂದ ಜಿಜೇಶ್
ಕೋಟೆ ಮಾರಿಯಮ್ಮ ದೇವಾಲಯದಿಂದ
ಪ್ರಜ್ವಲ್ ಹಾಗೂ ಕಂಚಿ ಕಾಮಾಕ್ಷಿಯಮ್ಮ ದೇವಾಲಯದಿಂದ ಗಿರೀಶ್ ಎಂಬುವರು ಕರಗ ಹೊತ್ತಿದ್ದರು.

ಕರಗ ಪೂಜೆ ಸಂದರ್ಭದಲ್ಲಿ ಶಾಸಕರಾದ ಡಾ. ಮಂತರ್ ಗೌಡ, ನಗರಸಭೆ ಅಧ್ಯಕ್ಷರಾದ ಪಿ.ಕಲಾವತಿ, ಗ್ಯಾರಂಟಿ ಯೋಜನೆ ಅನುಷ್ಠಾನ ಸಮಿತಿ ಜಿಲ್ಲಾ ಅಧ್ಯಕ್ಷರಾದ ಧರ್ಮಜ ಉತ್ತಪ್ಪ, ವಿಧಾನ ಪರಿಷತ್ ಮಾಜಿ ಸದಸ್ಯರಾದ ಸುನಿಲ್ ಸುಬ್ರಮಣಿ, ವೀಣಾ ಅಚ್ಚಯ್ಯ, ಜಿಲ್ಲಾಧಿಕಾರಿ ಎಸ್.ಜೆ.ಸೋಮಶೇಖರ್, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಆರ್.ಎನ್.ಬಿಂದುಮಣಿ, ಉಪ ಅರಣ್ಯ ಸಂರಕ್ಷಣಾಧಿಕಾರಿ ಅಭಿಷೇಕ್, ಉಪ ಪೊಲೀಸ್ ವರಿಷ್ಠಾಧಿಕಾರಿ ಸೂರಜ್, ಪೌರಾಯುಕ್ತರಾದ ಎಚ್.ಆರ್.ರಮೇಶ್ ದಸರಾ ಸಮಿತಿ ಪ್ರಮುಖರಾದ ಅರುಣ್ ಕುಮಾರ್, ಮಹೇಶ್ ಜೈನಿ, ಅರುಣ್ ಶೆಟ್ಟಿ, ಸಬಿತಾ, ಪ್ರಕಾಶ್ ಆಚಾರ್ಯ, ಟಿ.ಪಿ.ರಮೇಶ್, ಅನಂತ ಶಯನ, ಜಿ.ಚಿದ್ವಿಲಾಸ್, ಅನಿಲ್ ಎಚ್ ಟಿ, ರಮೇಶ್, ಚುಮ್ಮಿ ದೇವಯ್ಯ, ಮೋಹನ್, ಕವನ್ ಮಡಿಕೇರಿ ದಸರಾ ಹಾಗೂ ವಿವಿಧ ದೇವಾಲಯ ಸಮಿತಿ ಪ್ರಮುಖರು ಇದ್ದರು.