ಮಂಡ್ಯ: ಸರ್ವೋಚ್ಚ ನ್ಯಾಯಾಲಯದ ಮುಖ್ಯ ನ್ಯಾಯಮೂರ್ತಿಗಳ ನೇತೃದಲ್ಲಿ ಏಳು ಮಂದಿ ನ್ಯಾಯಾಧೀಶರು ಪರಿಶಿಷ್ಟ ಜಾತಿಯ ಒಳ ಮೀಸಲಾತಿ ಬಗ್ಗೆ ನೀಡಿರುವ ಆದೇಶವನ್ನು ಕೂಡಲೇ ಜಾರಿಗೆ ತರಲು ಕ್ರಮ ವಹಿಸಬೇಕೆಂದು ಬಿಜೆಪಿ ಮುಖಂಡ ಬಿ.ಕೃಷ್ಣ ರಾಜ್ಯ ಸರ್ಕಾರವನ್ನು ಒತ್ತಾಯಿಸಿದರು.

ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಸರ್ವೋಚ್ಚ ನ್ಯಾಯಾಲಯದ ಮುಖ್ಯ ನ್ಯಾಯಮೂರ್ತಿ ಚಂದ್ರಚೂಡ್ ಅವರ ನೇತೃತ್ವದಲ್ಲಿ ಏಳು ಮಂದಿ ನ್ಯಾಯಾಧೀಶರು ಒಳ ಮೀಸಲಾತಿ ನೀಡುವ ಸಂಬಂಧ ಆಯಾ ರಾಜ್ಯಗಳಿಗೆ ಅಧಿಕಾರವಿದೆ ಎಂದು ತಿಳಿಸಿದೆ. ಹಾಗಾಗಿ ನ್ಯಾಯಾಲಯದ ಆದೇಶದಂತೆ ರಾಜ್ಯ ಸರ್ಕಾರ ತುರ್ತಾಗಿ ಕ್ರಮ ವಹಿಸಬೇಕು ಎಂದು ಒತ್ತಾಯಿಸಿದರು.

ತುಳಿತಕ್ಕೆ ಒಳಗಾದವರು, ಶೋಷಿತ ಸಮಾಜಗಳ ಏಳಿಗೆಗಾಗಿ ದಲಿತ ಸಂಘರ್ಷ ಸಮಿತಿ, ಮಾದಿಗ ಮೀಸಲಾತಿ ಹೋರಾಟ ಸಮಿತಿ, ಆದಿ ಜಾಂಬವ ಸಂಘ ಸೇರಿದಂತೆ ಹಲವು ಸಂಘಟನೆಗಳು ಹಲವಾರು ವರ್ಷಗಳಿಂದ ಹೋರಾಟ ನಡೆಸಿದೆ. ನ್ಯಾಯಾಲಯದ ಈ ಆದೇಶ ನಮ್ಮ ಹೋರಾಟಕ್ಕೆ ಸಂದ ಜಯವಾಗಿದೆ ಎಂದರು.

ಈ ಹಿಂದೆ ನ್ಯಾಯಮೂರ್ತಿ ಸದಾಶಿವಯ್ಯ ಅವರ ನೇತೃತ್ವದಲ್ಲಿ ಸಮಿತಿ ರಚಿಸಿ ವರದಿ ತರಿಸಿಕೊಂಡಿದ್ದರು. ಆದರೆ ಆ ವರದಿಯನ್ನು ಯಾರು ಪರಿಗಣಿಸಲಿಲ್ಲ ಎಂದರು.
ಬಸವರಾಜ ಬೊಮ್ಮಾಯಿ ಅವರು ಮುಖ್ಯ ಮಂತ್ರಿಯಾಗಿದ್ದ ಸಂದರ್ಭದಲ್ಲಿ ಮಾಧವ್ ಸ್ವಾಮಿ ಅವರ ನೇತೃತ್ವದಲ್ಲಿ ಸಮಿತಿ ರಚಿಸಿ ವರದಿ ಪಡೆದು ಕೇಂದ್ರ ಸರ್ಕಾರಕ್ಕೆ ಕಳುಹಿಸಿದ್ದರು.

ಇತರರು ನ್ಯಾಯಾಲಯದ ಮೊರೆ ಹೋಗಿದ್ದರು. ಆದರೆ ನ್ಯಾಯಾಲಯ ಕೂಲಂಕುಶವಾಗಿ ಪರಿಶೀಲಿಸಿ ಈ ಆದೇಶ ನೀಡಿರುವುದು ಉತ್ತಮ ಬೆಳವಣಿಗೆಯಾಗಿದೆ. ಆದ್ದರಿಂದ ಈ ಆದೇಶವನ್ನು ಶೀಘ್ರವಾಗಿ ಜಾರಿಗೆ ತರಬೇಕೆಂದು ಒತ್ತಾಯಿಸಿದರು.

ಗೋಷ್ಠಿಯಲ್ಲಿ ಆದಿ ಜಾಂಬವ ಸಂಗದ ಜಿಲ್ಲಾಧ್ಯಕ್ಷ ಕನಲಿ ಚನ್ನಪ್ಪ, ಕಾರ್ಯದರ್ಶಿ ಗವಿ ಸೇರಿದಂತೆ ಇತರರು ಉಪಸ್ಥಿತರಿದ್ದರು.

ಮಂಡ್ಯ: ನಗರದ ಮಾರ್ಕೆಟಿನಲ್ಲಿ ಚಿಲ್ಲರೆ ಅಂಗಡಿ ಇಟ್ಟುಕೊಂಡು ವ್ಯಾಪಾರ ಮಾಡುತ್ತಿರುವ ಜಿ.ಜೆ.ಶಿವಕುಮಾರ್ ಅವರಿಗೆ ಸೇರಿದ ಐದು ಚೆಕ್ಕುಗಳು ಮತ್ತು 5 ಆನ್ ಡಿಮ್ಯಾಂಡ್ ಪ್ರೊನೋಟ್ ಕಳುವಾಗಿದ್ದು, ಯಾರಿಗಾದರೂ ಸಿಕ್ಕಿದ್ದಲ್ಲಿ ಸೆಂಟ್ರಲ್ ಪೊಲೀಸ್ ಠಾಣೆಗೆ ತಲುಪಿಸುವಂತೆ ಅವರ ಸಹೋದರ ಗಾಂಧಾಳು ಜಯರಾಮ್ ಮನವಿ ಮಾಡಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು ಜಿ.ಜೆ.ಶಿವಕುಮಾರ್ ಅವರು ಮಂಡ್ಯ ನಗರದ ಮಾರುಕಟ್ಟೆಯಲ್ಲಿ ಚಿಲ್ಲರೆ ಅಂಗಡಿ ಇಟ್ಟುಕೊಂಡು ವ್ಯಾಪಾರ ಮಾಡುತ್ತಿದ್ದಾರೆ. ಅವರು ಹನಕೆರೆ ಗ್ರಾಮದ ನಿವಾಸಿ ವಸಂತ ಕೋಂ ರಮೇಶ ಮತ್ತು ಅವರ ಮಗಳಾದ ಶಿಲ್ಪ ಅವರಿಗೆ ಐದು ಚೆಕ್ಕು ಮತ್ತು ಐದು ಆಡಿಮಂಡ್ ನೀಡಿ 3ಲಕ್ಷ ರೂಪಾಯಿ ಸಾಲ ಪಡೆದಿದ್ದಾರೆ. ಈ ಪೈಕಿ ಎರಡು ಲಕ್ಷ ರೂಪಾಯಿ ತೀರಿಸಲಾಗಿದೆ ಎಂದರು.

ಉಳಿಕೆ ಹಣವನ್ನು ನೀಡುತ್ತೇವೆ ದಾಖಲೆ ನೀಡಿ ಎಂದರೆ ಸಾಲ ನೀಡಿದ್ದವರು ಚೆಕ್, ಆನ್ ಡಿಮ್ಯಾಂಡ್ ಪ್ರೊನೋಟ್ ಕೊಟ್ಟಿದ್ದೇನೆ. ಇವರು ಯಾವುದೇ ಹಣ ನನಗೆ ನೀಡಬೇಕಿಲ್ಲ ಎಂದು ಪೊಲೀಸ್ ಠಾಣೆಯಲ್ಲಿ ತಿಳಿಸಿದ್ದಾರೆ.

ಆದ ಕಾರಣ ಈ ಚೆಕ್ಕುಗಳು ದುರುಪಯೋಗ ಆಗಬಹುದೆಂದು ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಹಾಗಾಗಿ ಯಾರಿಗಾದರೂ ಚೆಕ್ಕುಗಳು ಸಿಕ್ಕಿದ ಪಕ್ಷದಲ್ಲಿ ಪೊಲೀಸ್ ಠಾಣೆಗೆ ತಂದು ಒಪ್ಪಿಸಬೇಕು. ಇಲ್ಲದಿದ್ದಲ್ಲಿ ಚಕ್ಕನ್ನು ದುರುಪಯೋಗ ಪಡಿಸಿಕೊಂಡಲ್ಲಿ ಅಂತಹವರ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸುವುದಾಗಿ ತಿಳಿಸಿದರು.

ಗೋಷ್ಠಿಯಲ್ಲಿ ಚಿಲ್ಲರೆ ಅಂಗಡಿ ವ್ಯಾಪಾರಿ ಡಿಜೆ ಶಿವಕುಮಾರ್, ಜಿ ಮಲ್ಲಿಗೆರೆ‌ ಅಣ್ಣೇಗೌಡ, ಕೊಮ್ಮೇರಹಳ್ಳಿ ಆನಂದ ಉಪಸ್ಥಿತರಿದ್ದರು.

ಮಂಡ್ಯ : ಪಶ್ಚಿಮ ಘಟ್ಟ ಉಳಿಯಲು ಗಾಡ್ಗಿಲ್ ವರದಿ ಜಾರಿಯಾಗಲಿ ಎಂದು ಎನ್ಇ ಸಿ ಎಫ್ ಹಾಗೂ ರೈತ ಸಂಘಟನೆಗಳು ಒತ್ತಾಯಿಸಿದ್ದಾರೆ.

ಪ್ರಸ್ತುತ ಪಶ್ಚಿಮ ಘಟ್ಟ ಸೆರಗಿನಲ್ಲಿ ಜರುಗುತ್ತಿರುವ ಸಾಲು ಸಾಲು ಗುಡ್ಡ ಕುಸಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಶ್ಚಿಮ ಘಟ್ಟದ ಉಳಿಯಬೇಕಾದರೆ, ಶಿರೂರು ವಯನಾಡಿನಂತಹ ದುರಂತಗಳು ಮುಂದೆ ನಡೆಯಬಾರದು ಎಂದಾದರೆ ಮಾಧವ ಗಾಡ್ಗೀಳ್ ವರದಿಯನ್ನು ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಜಾರಿಗೊಳಿಸಬೇಕು ಎಂದು ರಾಷ್ಟ್ರೀಯ ಪರಿಸರ ಸಂರಕ್ಷಣಾ ಒಕ್ಕೂಟ ಹಾಗೂ ರಾಜ್ಯ ರೈತ ಸಂಘ ಪರಿಸರ ಬಳಗದ ಸಂಘಟನೆಗಳು ಒತ್ತಾಯಿಸಿದವು.

ನಗರದ ಪ್ರೆಸ್‌ಕ್ಲಬ್‌ನಲ್ಲಿ ಮಂಗಳವಾರ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಒಕ್ಕೂಟದ ಪ್ರಮುಖರಾದ ಪರಿಸರ ರಮೇಶ್, ಅವೈಜ್ಞಾನಿಕವಾಗಿ ರಸ್ತೆ ಅಗಲೀಕರಣ, ಪ್ರವಾಸೋದ್ಯಮದ ಹೆಸರಿನಲ್ಲಿ ರೋಪ್‌ವೇ, ಸುರಂಗ ಮಾರ್ಗ ಗಳನ್ನು ಮಾಡುತ್ತ ಹೋದರೆ ಮುಂದೊಂದು ದಿನ ಪಶ್ಚಿಮ ಘಟ್ಟ ನೂರಾರು ದುರಂತ ಕಥೆಗಳಿಗೆ ಸಾಕ್ಷಿಯಾಗಲಿದೆ. ಆದ್ದರಿಂದ ಕೂಡಲೇ ಸರ್ಕಾರ ಎಚ್ಚೆತ್ತುಕೊಳ್ಳಬೇಕು ಹಾಗೂ ಮಾಧವ ಗಾಡ್ಗೀಳ್, ಕಸ್ತೂರಿ ರಂಗನ್ ವರದಿಯನ್ನು ಕೂಡಲೇ ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಎಂದು ಆಗ್ರಹಿಸಿದರು.

ತೀರ್ಥಹಳ್ಳಿ- ಆಗುಂಬೆ ಪಶ್ಚಿಮ ಘಟ್ಟ ಮಾರ್ಗದಲ್ಲಿ ಸುರಂಗ ಮಾರ್ಗ, ಹುಬ್ಬಳ್ಳಿ ಅಂಕೋಲ ರೈಲುಮಾರ್ಗಕ್ಕಾಗಿ 2 ಲಕ್ಷ ಮರ ಗಳನ್ನು ಕಡಿಯಲು ಸಮೀಕ್ಷೆ, ಶರಾವತಿ ಭೂಗರ್ಭ ಯೋಜನೆಗಾಗಿ ಮತ್ತೆ ಸಾಗರದಿಂದ ಶಿರಸಿವರೆಗೆ ರೈಲು ಮಾರ್ಗ, ಧರ್ಮಸ್ಥಳ ಹಾಗೂ ಕೊಲ್ಲೂರಿನಲ್ಲಿ ಏರ್ಪೋರ್ಟ್ ನಿಲ್ದಾಣ ಶಿವಮೊಗ್ಗದಿಂದ ಸಾಗರದವರೆಗೆ ಚತುಷ್ಪಥ ರಸ್ತೆ ನಿರ್ಮಾಣ ಮಾಡುವುದಕ್ಕೆ ಸರ್ಕಾರ ಮುಂದಾಗಿದೆ. ಇವೆಲ್ಲವೂ ಪರಿಸರ ಸೂಕ್ಷ್ಮ ಪ್ರದೇಶಗಳಾಗಿದ್ದು, ಜೀವಸಂಕುಲಕ್ಕೆ ಮಾರಕವಾಗಲಿದೆ ಎಂದು ವಿಷಾದ ವ್ಯಕ್ತಪಡಿಸಿದರು.

ರೈತ ಸಂಘದ ಜಿಲ್ಲಾಧ್ಯಕ್ಷ ಕೆಂಪು ಗೌಡ ಮಾತನಾಡಿ, ಆಡಳಿತಕ್ಕೆ ಬರುವ ಪ್ರತಿ ಸರ್ಕಾರಗಳು ವೈಜ್ಞಾನಿಕವಾದ ಸಮಿತಿಗಳನ್ನು ರಚನೆ ಮಾಡಿ ಪರಿಸರ ಕುರಿತ ಸಾಧಕ ಬಾದಕಗಳ ಬಗ್ಗೆ ಚರ್ಚಿಸಿ ಯೋಜನೆಗಳನ್ನು ರೂಪಿಸುವುದರ ಬದಲು ಅವೈಜ್ಞಾನಿಕ ಕಾಮಗಾರಿ ಯೋಜನೆಗಳನ್ನು ಕೈಗೆತ್ತಿಕೊಳ್ಳುತ್ತಿದೆ. ರೈಲು ಸುರಂಗ ಮಾರ್ಗಗಳು ಚತುಸ್ಪತ ರಸ್ತೆಗಳು, ಹೋಂ ಸ್ಟೇ ರೆಸಾರ್ಟ್ಸ ಗಳು ಅಕ್ರಮ ಅರಣ್ಯ ಒತ್ತುವರಿ ಮುಂತಾದ ಅರಣ್ಯೇತರ ಚಟುವಟಿಕೆಗಳು ಪ್ರವಾಸೋದ್ಯಮದ ಹೆಸರಿನಲ್ಲಿ ನಡೆಯುತ್ತಿರುವ ಅಕ್ರಮ ಟ್ರಕಿಂಗ್ ರದ್ದುಪಡಿಸದಿದ್ದರೆ ಮುಂದೊಂದು ದಿನ ಇಡೀ ಪಶ್ಚಿಮಘಟ್ಟವೇ ದುರಂತಕ್ಕೆ ಸಾಕ್ಷಿಯಾಗಲಿದೆ. ಗುಡ್ಡ ಕುಸಿತವಾಗುತಿರುವುದು ಹೆಚ್ಚು ಮಳೆಯಿಂದಲ್ಲ ಅವೈಜ್ಞಾನಿಕ ಅಭಿವೃದ್ದಿ ಯೋಜನೆಗಳಿಂದ ಎಂದು ಆತಂಕ ವ್ಯಕ್ತಪಡಿಸಿದರು.

ಸುದ್ದಿಗೋಷ್ಠಿಯಲ್ಲಿ ರಾಷ್ಟ್ರೀಯ ಪರಿಸರ ಸಂರಕ್ಷಣಾ ಒಕ್ಕೂಟ ಮಂಡ್ಯ ಜಿಲ್ಲಾ ಘಟಕದ ಪರಿಸರ ರಮೇಶ್, ಮಂಗಲ ಯೋಗೇಶ್. ಜಿಲ್ಲಾ ರೈತ ಸಂಘದ ಅಧ್ಯಕ್ಷರಾದ ಕೆಂಪುಗೌಡ, ರೈತ ಸಂಘದ ಹೋರಾಟಗಾರರಾದ ಮಂಜುನಾಥ್ ಎಣ್ಣೆ ಹೊಳೆ ಕೊಪ್ಪಲು ರಘು, ಹರವು ಪ್ರಕಾಶ್, ವಿಜಯ್ ಕುಮಾರ್, ಹರವು ಗೋವಿಂದರಾಜ್, ಗಾಂಧಾಳು ಜಯರಾಮ್ ಕರುನಾಡ ಸೇವಕರು ಸಂಘಟನೆಯ ನಗರ ಘಟಕದಾದ್ಯಂತ ಮಂಜಣ್ಣ,, ಮಲ್ಲಿಗೆರೆ ಅಣ್ಣಯ್ಯ, ಕುಂಬೇರಹಳ್ಳಿ ಆನಂದ್ ಇತರೆ ಪರಿಸರ ಆಸಕ್ತ ಪ್ರಮುಖರು ಉಪಸ್ಥಿತರಿದ್ದು ಮಾಧವ ಗಾಡ್ಗಿಲ್ ವರದಿಯನ್ನು ಜಾರಿಗೊಳಿಸುವಂತೆ ಸರ್ಕಾರವನ್ನು ಒತ್ತಾಯಿಸಿದರು.