ಬೆಂಗಳೂರು ಚಿತ್ರೋತ್ಸವ ಇನ್ನೇನು ಅಂತಿಮ ಕ್ಷಣ ತಲುಪುತ್ತಿದ್ದು, ಫೆ.5ರಂದು ನೋಡಬಹುದಾದ 10 ಸಿನಿಮಾಗಳ ಪಟ್ಟಿ ಇಲ್ಲಿದೆ:

1. ಜೀವನ ಚೈತ್ರ (ಕನ್ನಡ)
ಸಮಯ: ಸಂಜೆ 7:50 | ಸ್ಕ್ರೀನ್: 7
ವಿಶೇಷತೆ: ಡಾ. ರಾಜ್ಕುಮಾರ್ ಅಭಿನಯದ 1992 ರ ಈ ಅದ್ಭುತ ಕಾವ್ಯ ಈಗ ಡಿಜಿಟಲ್ 4ಕೆ ರೂಪದಲ್ಲಿ ಸಿದ್ಧಗೊಂಡಿದೆ. ಕನ್ನಡ ಚಿತ್ರರಂಗದ ಈ ಸ್ತಂಭವನ್ನು ಅತ್ಯಾಧುನಿಕ ಸ್ಪಷ್ಟತೆಯಲ್ಲಿ ನೋಡುವ ಅಪರೂಪದ ಅವಕಾಶ ಇದಾಗಿದೆ.

2. ಭೂಮಿಕಾ (ಹಿಂದಿ)
ಸಮಯ: ಮಧ್ಯಾಹ್ನ 1:00 | ಸ್ಕ್ರೀನ್: ವಿಐಪಿ 2
ವಿಶೇಷತೆ: ಶ್ಯಾಮ್ ಬೆನಗಲ್ ನಿರ್ದೇಶನದ ಮತ್ತು ಸ್ಮಿತಾ ಪಾಟೀಲ್ ಅಭಿನಯದ ಈ ಚಿತ್ರವು ಉತ್ಸವದ ‘ಪಾಟೀಲ್ ರೆಟ್ರೋಸ್ಪೆಕ್ಟಿವ್’ ವಿಭಾಗದ ಪ್ರಮುಖ ಆಕರ್ಷಣೆಯಾಗಿದೆ. ಒಬ್ಬ ನಟಿಯ ಅಸ್ಮಿತೆಯ ಕುರಿತಾದ ಅತ್ಯುತ್ತಮ ಚಿತ್ರವಿದು.

3. ಪ್ಯಾಲೆಸ್ಟೈನ್ 36 (ಅರೇಬಿಕ್)
ಸಮಯ: ಸಂಜೆ 5:10 | ಸ್ಕ್ರೀನ್: 8
ವಿಶೇಷತೆ: ನಿರ್ದೇಶಕಿ ಆನ್ನೆಮರಿ ಜಾಸಿರ್ ಅವರ ಐತಿಹಾಸಿಕ ಮಹಾಕಾವ್ಯವಿದು. 98ನೇ ಅಕಾಡೆಮಿ ಪ್ರಶಸ್ತಿಗಳಿಗೆ ಪ್ಯಾಲೆಸ್ಟೈನ್ನ ಅಧಿಕೃತ ಪ್ರವೇಶವಾಗಿದ್ದ ಈ ಚಿತ್ರವು ಅಂತರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚು ಗಮನ ಸೆಳೆದಿದೆ.

4. ಕೇಸ್ 137 (ಫ್ರೆಂಚ್)
ಸಮಯ: ಸಂಜೆ 5:20 | ಸ್ಕ್ರೀನ್: 7
ವಿಶೇಷತೆ: ಸಸ್ಪೆನ್ಸ್ ಇಷ್ಟಪಡುವವರಿಗಾಗಿ ಡೊಮಿನಿಕ್ ಮೋಲ್ ನಿರ್ದೇಶನದ ಈ 2025ರ ಥ್ರಿಲ್ಲರ್ ಸಿನಿಮಾ, ಯುರೋಪಿಯನ್ ಶೈಲಿಯ ಚಿತ್ರವಿದು.

5. ದಿ ಪ್ರಾಮಿಸ್ಡ್ ಲ್ಯಾಂಡ್ (ಪೋಲಿಷ್)
ಸಮಯ: ಬೆಳಗ್ಗೆ 9:30 | ಸ್ಕ್ರೀನ್: ವಿಐಪಿ 2
ವಿಶೇಷತೆ: ಆಂಡ್ರೆಜ್ ವಾಜ್ದಾ ಅವರ ಸ್ಮರಣಾರ್ಥ ಪ್ರದರ್ಶಿಸಲಾಗುತ್ತಿರುವ ಈ 1975 ರ ಕ್ಲಾಸಿಕ್ ಚಿತ್ರವು ಪೋಲಿಷ್ ಚಿತ್ರರಂಗದ ಶ್ರೇಷ್ಠ ಚಿತ್ರಗಳಲ್ಲಿ ಒಂದೆಂದು ಪರಿಗಣಿಸಲ್ಪಟ್ಟಿದೆ. ಇದು ಕೈಗಾರಿಕಾ ಯುಗದ ಕ್ರೂರ ಆರಂಭವನ್ನು ಚಿತ್ರಿಸುತ್ತದೆ.

6. ಅಮ್ರಮ್ (ಜರ್ಮನ್)
ಸಮಯ: ಮಧ್ಯಾಹ್ನ 3:20 | ಸ್ಕ್ರೀನ್: 7
ವಿಶೇಷತೆ: ಖ್ಯಾತ ನಿರ್ದೇಶಕ ಫಾತಿಹ್ ಅಕಿನ್ ಅವರ ಇತ್ತೀಚಿನ ಕೃತಿಯಿದು. ಪ್ರಬಲವಾದ ಸಾಮಾಜಿಕ ಪ್ರಜ್ಞೆ ಮತ್ತು ದೃಷ್ಟಿಕೋನಗಳನ್ನು ಪ್ರಶ್ನಿಸುವ ಕಥಾಹಂದರವನ್ನು ಈ ಸಿನಿಮಾ ಹೊಂದಿದೆ.

7. ಉಯ್ಯಾಲೆ (ಕನ್ನಡ)
ಸಮಯ: ಸಂಜೆ 7:50 | ಸ್ಕ್ರೀನ್: ವಿಐಪಿ 2
ವಿಶೇಷತೆ: ಪರಂಪರೆಯನ್ನು ಪ್ರೀತಿಸುವವರಿಗೆ ಇದೊಂದು ಹಬ್ಬ. 1969 ರ ಈ ಮಾಸ್ಟರ್ಪೀಸ್ ಚಿತ್ರದಲ್ಲಿ ಡಾ. ರಾಜ್ಕುಮಾರ್ ಮತ್ತು ಕಲ್ಪನಾ ನಟಿಸಿದ್ದು, ತೀವ್ರ ಭಾವನೆಗಳ ಚಿತ್ರಣವನ್ನು ಹೊಂದಿದೆ.

8. ದಿ ಪೋರ್ಚುಗೀಸ್ ಹೌಸ್ (ಸ್ಪ್ಯಾನಿಷ್)
ಸಮಯ: ಸಂಜೆ 7:00 | ಸ್ಕ್ರೀನ್: 1
ವಿಶೇಷತೆ: ಅವೆಲಿನಾ ಪ್ರಾಟ್ ನಿರ್ದೇಶನದ ಸಮಕಾಲೀನ ಸ್ಪ್ಯಾನಿಷ್ ಡ್ರಾಮಾ ಇದಾಗಿದ್ದು, ಯುರೋಪಿಯನ್ ಜೀವನ ಮತ್ತು ಸಂಬಂಧಗಳ ಆಧುನಿಕ ನೋಟವನ್ನು ಕಾವ್ಯಾತ್ಮಕವಾಗಿ ದಾಖಲಿಸಿದೆ.

9. ಸರ್ಕ್ರೀಟ್ (ಮಲಯಾಳಂ)
ಸಮಯ: ಸಂಜೆ 5:30 | ಸ್ಕ್ರೀನ್: 2
ವಿಶೇಷತೆ: ಇತ್ತೀಚಿನ ಭಾರತೀಯ ಪ್ರಾದೇಶಿಕ ಸಿನಿಮಾಗಳ ಅತ್ಯುತ್ತಮ ಪ್ರಾತಿನಿಧ್ಯವಾಗಿರುವ ಮಲಯಾಳಂ ಸಿನಿಮಾ ಇದು.

10. ಫುಲ್ ಪ್ಲೇಟ್ (ಹಿಂದಿ)
ಸಮಯ: ಸಂಜೆ 4:30 | ಸ್ಕ್ರೀನ್: 6
ವಿಶೇಷತೆ: ತನ್ನಿಷ್ಠಾ ಚಟರ್ಜಿ ನಿರ್ದೇಶನದ ಈ ಚಿತ್ರವು ಸಮಕಾಲೀನ ಭಾರತೀಯ ಸಮಾಜದ ಕಥೆಯನ್ನು ಪ್ರಸ್ತುತಪಡಿಸುತ್ತದೆ.

ಬೆಂಗಳೂರು: ಅಂತರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಫೆಬ್ರವರಿ 4ರಂದು ಪ್ರದರ್ಶನಗೊಳ್ಳಲಿರುವ ಅತ್ಯುತ್ತಮ 10 ಚಿತ್ರಗಳ ಪಟ್ಟಿ ಇಲ್ಲಿದೆ:

1. ಮ್ಯಾನ್ ಆಫ್ ಮಾರ್ಬಲ್
ಬೆಳಿಗ್ಗೆ 09:50, ಸ್ಕ್ರೀನ್ 1
ವಿಶೇಷತೆ: ಪೋಲೆಂಡ್‌ನ ಖ್ಯಾತ ನಿರ್ದೇಶಕ ಆಂಡ್ರೆಜ್ ವಾಜ್ದಾ ಅವರ ಈ ಚಿತ್ರವು ರಾಜಕೀಯ ಸಿನೆಮಾದ ಒಂದು ಮೈಲಿಗಲ್ಲು. ಇವರ ಜನ್ಮಶತಮಾನೋತ್ಸವದ ಅಂಗವಾಗಿ ಈ ಚಿತ್ರವನ್ನು ಪ್ರದರ್ಶಿಸಲಾಗುತ್ತಿದೆ.

2. ದೋ ಬಿಘಾ ಜಮೀನ್
ರಾತ್ರಿ 07:10, ವಿಐಪಿ ಸ್ಕ್ರೀನ್ 1
ವಿಶೇಷತೆ: ಬಿಮಲ್ ರಾಯ್ ಅವರ ಈ ಸಾಮಾಜಿಕ ವಾಸ್ತವವಾದಿ ಚಿತ್ರವು ಕೇನ್ಸ್ ಚಲನಚಿತ್ರೋತ್ಸವದಲ್ಲಿ ಅಂತರಾಷ್ಟ್ರೀಯ ಪ್ರಶಸ್ತಿ ಗೆದ್ದಿದೆ.

3. ಕ್ರೌರ್ಯ
ಸಂಜೆ 05:30, ಸ್ಕ್ರೀನ್ 1
ವಿಶೇಷತೆ: ಗಿರೀಶ್ ಕಾಸರವಳ್ಳಿ ಅವರ 50 ವರ್ಷಗಳ ಸಿನಿಮಾ ಪಯಣದ ಅಂಗವಾಗಿ ಈ ಪ್ರಶಸ್ತಿ ವಿಜೇತ ಚಿತ್ರವನ್ನು ಪ್ರದರ್ಶಿಸಲಾಗುತ್ತಿದೆ. ತಣ್ಣನೆಯ ಕ್ರೌರ್ಯವನ್ನು ಈ ಸಿನಿಮಾ ಅನಾವರಣಗೊಳಿಸುತ್ತದೆ.

4. ಸಿಮೆಟ್ರಿ ಆಫ್ ಸ್ಪ್ಲೆಂಡರ್
ಸಂಜೆ 04:20, ವಿಐಪಿ ಸ್ಕ್ರೀನ್ 1
ವಿಶೇಷತೆ: ವಿಶ್ವವಿಖ್ಯಾತ ಥಾಯ್ ನಿರ್ದೇಶಕ ಅಪಿಚಾತ್‌ಪಾಂಗ್ ವೀರಸೇತಕುಲ್ ಅವರ ಈ ಚಿತ್ರವು ‘ಫಿಲ್ಮ್ ಮೇಕರ್ ಇನ್ ಫೋಕಸ್’ ವಿಭಾಗದ ಪ್ರಮುಖ ಆಕರ್ಷಣೆಯಾಗಿದೆ.

5. ಸಂಧ್ಯಾ ರಾಗ
ರಾತ್ರಿ 07:20, ವಿಐಪಿ ಸ್ಕ್ರೀನ್ 2
ವಿಶೇಷತೆ: ಡಾ. ರಾಜ್‌ಕುಮಾರ್ ನಟನೆಯ ಈ ಸಂಗೀತಮಯ ಕ್ಲಾಸಿಕ್ ಚಿತ್ರವನ್ನು ಸಂರಕ್ಷಿತ ಚಿತ್ರಗಳ ವಿಭಾಗದಲ್ಲಿ ಪ್ರದರ್ಶಿಸಲಾಗುತ್ತಿದೆ.

6. ಲಿಟಲ್ ಟ್ರಬಲ್ ಗರ್ಲ್ಸ್
ರಾತ್ರಿ 07:30, ಸ್ಕ್ರೀನ್ 4
ವಿಶೇಷತೆ: ಸ್ಲೊವೇನಿಯಾದ ಈ ಸಮಕಾಲೀನ ಚಿತ್ರವು ಕೇನ್ಸ್ ಚಲನಚಿತ್ರೋತ್ಸವದ ‘ಕ್ರಿಟಿಕ್ಸ್ ವೀಕ್’ನಲ್ಲಿ ಪ್ರದರ್ಶನ ಕಂಡು ವಿಮರ್ಶಕರ ಮೆಚ್ಚುಗೆ ಗಳಿಸಿದೆ.

7. ಭಕ್ತ ಕನಕದಾಸ
ಮಧ್ಯಾಹ್ನ 12:00, ಸ್ಕ್ರೀನ್ 6
ವಿಶೇಷತೆ: 1960ರ ದಶಕದ ಈ ಐತಿಹಾಸಿಕ ಕನ್ನಡ ಚಿತ್ರವು ನಮ್ಮ ಸಾಂಸ್ಕೃತಿಕ ಪರಂಪರೆಯನ್ನು ಜಾಗತಿಕ ಮಟ್ಟದಲ್ಲಿ ಪ್ರಸ್ತುತಪಡಿಸುತ್ತದೆ.

8. ಇನ್ನೋಸೆಂಟ್ ಸೊರ್ಸೆರರ್ಸ್
ಮಧ್ಯಾಹ್ನ 01:10, ಸ್ಕ್ರೀನ್ 1
ವಿಶೇಷತೆ: ಆಂಡ್ರೆಜ್ ವಾಜ್ದಾ ಅವರ ಈ ಚಿತ್ರವು 1960ರ ದಶಕದ ಪೋಲೆಂಡ್‌ನ ಯುವಜನತೆಯ ಬದುಕಿನ ಮೇಲೆ ಬೆಳಕು ಚೆಲ್ಲುತ್ತದೆ.

9. ಆನ್ ದಿ ಸಿಲ್ವರ್ ಗ್ಲೋಬ್
ಬೆಳಿಗ್ಗೆ 09:50, ವಿಐಪಿ ಸ್ಕ್ರೀನ್ 3
ವಿಶೇಷತೆ: ಆಂಡ್ರೆಜ್ ಜುಲಾವ್ಸ್ಕಿ ಅವರ ಈ ಸೈನ್ಸ್ ಫಿಕ್ಷನ್ ಚಿತ್ರವು ತನ್ನ ದೃಶ್ಯ ವೈಭವ ಮತ್ತು ತಾತ್ವಿಕ ಚಿಂತನೆಗಳಿಗೆ ಜಾಗತಿಕವಾಗಿ ಪ್ರಸಿದ್ಧವಾಗಿದೆ.

10. ದಿ ಗ್ರೇಟ್ ಆರ್ಚ್
ಬೆಳಿಗ್ಗೆ 10:00, ಸ್ಕ್ರೀನ್ 7
ವಿಶೇಷತೆ: ಸ್ಟೀಫನ್ ಡೆಮೌಸ್ಟಿಯರ್ ನಿರ್ದೇಶನದ ಈ ಫ್ರೆಂಚ್ ಚಿತ್ರವು ಯುರೋಪಿನ ಸಮಕಾಲೀನ ಚಿತ್ರಗಳ ವಿಭಾಗದಲ್ಲಿದೆ.

ಸಿನಿಮಾ ಛಾಯಾಗ್ರಾಹಣದ ಕುರಿತು ಮಾಸ್ಟರ್ ಕ್ಲಾಸ್ ನೀಡಿದ ಪ್ರಖ್ಯಾತ ಸಿನಿಮಾ ಛಾಯಾಗ್ರಾಹಕ

ಬೆಂಗಳೂರು ಚಿತ್ರೋತ್ಸವ ವೇದಿಕೆ: ‘ಅಧ್ಯಯನ ಮಾಡಿದ ಬಳಿಕ ಸಿನಿಮಾಗೆ ಬರುವುದು ಒಳಿತು. ಕಲಿತು ಬಂದು ಚಿತ್ರಗಳಲ್ಲಿ ಪ್ರಯೋಗ ಮಾಡಬೇಕು. ಈಗ ಬಹುತೇಕರು ಮೊದಲು ಸಿನಿಮಾಗೆ ಬಂದು, ಆಮೇಲೆ ಕಲಿಯುತ್ತೇನೆ ಎನ್ನುತ್ತಾರೆ. ಆಗ ಪ್ರಯೋಗ ಮಾಡುವ ಅವಕಾಶ ಇರುವುದಿಲ್ಲ. ಈ ನಿಟ್ಟಿನಲ್ಲಿ ಪ್ರತಿಯೊಬ್ಬ ಸಿನಿಮಾ ಕರ್ಮಿಗೂ ಶಿಸ್ತು ಇರಬೇಕು. ಆ ಶಿಸ್ತಿನಿಂದಾಗಿಯೇ ಹಾಲಿವುಡ್ ನಲ್ಲಿ ಇವತ್ತಿಗೂ 65 ವರ್ಷ, 70 ವರ್ಷದವರು ಕಾರ್ಯ ನಿರ್ವಹಿಸುತ್ತಿದ್ದಾರೆ’ ಎಂದು ದೇಶದ ಪ್ರಖ್ಯಾತ ಸಿನಿಮಾ ಛಾಯಾಗ್ರಾಹಕ ಆರ್. ರತ್ನವೇಲು ಹೇಳಿದರು.

17ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವದ ‘ಬೆಳಕು ಭಾಷೆಯಾದಾಗ’ ಎಂಬ ಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಿನಿಮಾ ಛಾಯಾಗ್ರಾಹಣದ ಕುರಿತು ತಮ್ಮ ಅನುಭವಗಳನ್ನು ಹಂಚಿಕೊಂಡರು. ‌

‘ನಾನು ಮೊದಲು ಸ್ಕ್ರಿಪ್ಟ್ ಅನ್ನು ಎರಡು ಮೂರು ಬಾರಿ ಓದುತ್ತೇನೆ. ನಿರ್ದೇಶಕರ ದೃಷ್ಟಿಕೋನವನ್ನು ಅರ್ಥಮಾಡಿಕೊಳ್ಳಲು ಯತ್ನಿಸುತ್ತೇನೆ. ನಂತರ ನಿರ್ದೇಶಕರ ಕತೆಯನ್ನು, ಆ ಕತೆಯ ಭಾವವನ್ನು ಅವರು ಕಲ್ಪಿಸಿದ್ದಕ್ಕಿಂತ ವಿಭಿನ್ನವಾಗಿ, ಉತ್ತಮವಾಗಿ ಹೇಗೆ ದೃಶ್ಯ ಭಾಷೆಯ ಮೂಲಕ ಕಟ್ಟಿಕೊಡಬಹುದು ಎಂದು ನೋಡುತ್ತೇನೆ. ನಾನು ಬರವಣಿಗೆ ಹಂತದಿಂದ ಸಿನಿಮಾ ಚಿತ್ರಮಂದಿರಕ್ಕೆ ಬರುವವರೆಗೂ ಜೊತೆ ಇರುತ್ತೇನೆ’ ಎಂದು ಹೇಳಿದರು.

ಕಮರ್ಷಿಯಲ್ ಮತ್ತು ಪ್ರಯೋಗಾತ್ಮಕ ಚಿತ್ರಗಳ ಕುರಿತು ಮಾತನಾಡಿದ ಅವರು, ‘ನನಗೆ ಸಣ್ಣ ಬಜೆಟ್ ಸಿನಿಮಾಗಳನ್ನು, ಕಮರ್ಷಿಯಲ್ ಸಿನಿಮಾಗಳನ್ನು ಎರಡೂ ಮಾಡುವುದಿಷ್ಟ. ಆದರೆ, ಕಮರ್ಷಿಯಲ್ ಸಿನಿಮಾ ಸ್ವಲ್ಪ ಸವಾಲಿನ ಕೆಲಸ. ಅಲ್ಲಿ ಬೆಳಿಗ್ಗೆ ಬಂದಾಗ ಸ್ಟಾರ್ ಗಳು 3 ಗಂಟೆಗೆ ಹೋಗುತ್ತಾರೆ, ಬೇಗ ಶೂಟ್ ಮಾಡಬೇಕು ಎಂದು ಹೇಳುತ್ತಾರೆ. ಆಗ ಸಮಯದ ಪರಿಮಿತಿಯಲ್ಲಿ ಕೆಲಸ ಮಾಡಬೇಕಿರುತ್ತದೆ. ಟೀಟ್ವೆಂಟಿ ಮಾದರಿಯಲ್ಲಿ ರನ್ ಗಳಿಸಬೇಕಿರುತ್ತದೆ. ನಾವು ಪರಿಸ್ಥಿತಿಗೆ ತಕ್ಕಂತೆ ನಮ್ಮ ಯೋಜನೆಗಳನ್ನು ಬದಲಿಸುತ್ತಾ ಇರಬೇಕು. ಅದಕ್ಕೆ ನಾವು ಸಿದ್ಧರಿರಬೇಕು’ ಎಂದರು.

‘ಪುಷ್ಪ’ ನಿರ್ದೇಶಕ ಸುಕುಮಾರ್ ಅವರ ಜೊತೆಗೆ ಕೆಲಸ ಮಾಡುವ ಅನುಭವ ಹಂಚಿಕೊಂಡ ಅವರು, ‘ಸುಕುಮಾರ್ ಜೊತೆ ಸಿನಿಮಾ ಮಾಡುವಾಗ ನನಗೆ ಸಿನಿಮಾ ಸಂಬಂಧಿಸಿದಂತೆ ಏನಾದರೂ ಐಡಿಯಾ ಬಂದರೆ ರಾತ್ರಿ 11 ಗಂಟೆಯಾದರೂ ಅವರಿಗೆ ಕಾಲ್ ಮಾಡುತ್ತೇನೆ. ‘ರಂಗಸ್ಥಳಂ’ ಸಿನಿಮಾ ಮಾಡುವಾಗ ಅವರಿಗೆ ಕಾಲ್ ಮಾಡಿದ್ದೆ. ನಾವು ಹುಲ್ಲಿನ ಮಧ್ಯೆ ಹಾವು ಹರಿದುಹೋಗುವಂತೆ ಕ್ಯಾಮೆರಾ ಬಳಕೆ ಮಾಡೋಣ ಎಂದು ಹೇಳಿದ್ದೆ. ಅವರು ಖುಷಿಯಾಗಿ ಎದ್ದು ಬಂದಿದ್ದರು. ಆ ಸಿನಿಮಾದಲ್ಲಿ ನಾನು ಮೊದಲ ಬಾರಿಗೆ ಗಿಂಬಲ್ ಬಳಕೆ ಮಾಡಿದ್ದೆ. ಶೇ.90ರಷ್ಟು ಸಿನಿಮಾ ಗಿಂಬಲ್ ನಲ್ಲಿಯೇ ಚಿತ್ರೀಕರಣ ಮಾಡಿದ್ದೆವು. ನಾಯಕನ ಹಿಂದೆಯೇ ಕ್ಯಾಮೆರಾ ಚಲಿಸುತ್ತಾ ಇರುತ್ತದೆ. ಆಗ ಸುಕುಮಾರ್ ಈ ಚಿತ್ರಕ್ಕೆ ಬೇಕಿದ್ದ ದೃಶ್ಯ ಭಾಷೆ ಇದೇ ಎಂದು ಸಂತೋಷಪಟ್ಟಿದ್ದರು. ಪ್ರತೀ ಚಿತ್ರಕ್ಕೂ ಒಂದು ದೃಶ್ಯ ಭಾಷೆ ಇರುತ್ತದೆ. ಸಿನಿಮಾ ಅರ್ಥ ಮಾಡಿಕೊಂಡಾಗ ಆ ದೃಶ್ಯ ಭಾಷೆಯನ್ನು ನಾವು ರೂಪಿಸಿಕೊಳ್ಳಬಹುದು’ ಎಂದು ಹೇಳಿದ ಅವರು, ‘ನನಗೂ ಸುಕುಮಾರ್ ಅವರಿಗೂ ಸಿನಿಮಾನೇ ಮೊದಲ ಆದ್ಯತೆ, ಉಳಿದೆಲ್ಲವೂ ನಂತರ’ ಎಂದು ಸಿನಿಮಾ ಪ್ಯಾಷನ್ ಕುರಿತು ಒತ್ತಿ ಹೇಳಿದರು.

‘ನಾವು ದೃಶ್ಯಗಳ ಮೂಲಕ ಪ್ರೇಕ್ಷಕರು ತೀವ್ರವಾಗಿ ಕತೆಯಲ್ಲಿ ತೊಡಗಿಕೊಳ್ಳುವಂತೆ ಮಾಡಬೇಕು. ಸಿನಿಮಾ ಛಾಯಾಗ್ರಾಹಣದಲ್ಲಿ ಬೆಳಕು ತುಂಬಾ ಮುಖ್ಯ. ನನ್ನ ಪಾಲಿಗೆ ಬೆಳಕೇ ಒಂದು ಭಾವ. ಪಾತ್ರವನ್ನು ವಿಶೇಷಗೊಳಿಸುವುದು ಬೆಳಕು. ಮೂಡ್ ಕ್ರಿಯೇಟ್ ಮಾಡುವುದು ಬೆಳಕು. ಬೆಳಕನ್ನು ಹೇಗೆ ಬಳಸಬೇಕು ಅನ್ನುವುದನ್ನು ಪ್ರತಿಯೊಬ್ಬ ಸಿನಿಮಾ ಛಾಯಾಗ್ರಾಹಕನೂ ಕಲಿಯಬೇಕು. ‘ನೇನೊಕ್ಕಡಿನ’ ಸಿನಿಮಾದ ಸಾಹಸ ಚಿತ್ರೀಕರಣ ಲಂಡನ್ ನಲ್ಲಿ ನಡೆಯುತ್ತಿತ್ತು. ಅಂಡರ್ ಗ್ರೌಂಡ್ ನಲ್ಲಿದ್ದ ಪಾರ್ಕಿಂಗ್ ಲಾಟ್ ನಲ್ಲಿ ಈ ಚಿತ್ರೀಕರಣ ಇತ್ತು. ಎಷ್ಟು ಲೈಟ್ ಬೇಕು ಎಂದು ಕೇಳಿದರು. ನನಗೆ ಮೂರು ನಾಲ್ಕು ಎಲ್ಇಡಿ ಲೈಟ್ ಸಾಕು ಎಂದು ಹೇಳಿದೆ. ಅಲ್ಲಿನವರು ಆಶ್ಚರ್ಯಚಕಿತರಾದರು. ನಾನು ಅಲ್ಲಿನ ಕಾರ್, ಬೈಕ್ ಗಳ ಬೆಳಕನ್ನು ಬಳಸಿ ಚಿತ್ರೀಕರಣ ಮಾಡಿದೆ. ಇಡೀ ತಂಡ ಚಪ್ಪಾಳೆ ತಟ್ಟಿತು’ ಎಂದರು.

‘ನಾನು ದಿಗ್ಗಜರಿಂದ ಬಹಳಷ್ಟು ಕಲಿತಿದ್ದೇನೆ. ಅವರ ಸಿನಿಮಾಗಳನ್ನು ನೋಡಿ ಅವರ ತಂತ್ರಗಳನ್ನು ನೋಡಿ ಚಕಿತಗೊಂಡಿದ್ದೇನೆ. ಹಿರಿಯರು ಯಾವುದೇ ಸೌಲಭ್ಯ ಇಲ್ಲದೇ ಇದ್ದಾಗಲೂ ಅತ್ಯುತ್ತಮ ದೃಶ್ಯಗಳನ್ನು ತೆರೆ ಮೇಲೆ ತಂದಿದ್ದಾರೆ. ಈಗ ನಮಗೆ ಎಲ್ಲಾ ಸೌಲಭ್ಯಗಳಿವೆ. ಅದನ್ನು ಬಳಸಿಕೊಂಡು ಉತ್ತಮ ದೃಶ್ಯಗಳನ್ನು ರೂಪಿಸಬಹುದು. ಹಿರಿಯರಿಂದ ಕಲಿಯುವುದು ಬಹಳ ಮುಖ್ಯ. ಸೆಟ್ ನಲ್ಲಿ ಸೂರ್ಯನ ಬೆಳಕನ್ನು ಸಿದ್ಧ ಮಾಡುವುದನ್ನು ಕಲಿಯುವುದಕ್ಕೆ ನಾನು ಹತ್ತು ವರ್ಷ ತೆಗೆದುಕೊಂಡೆ, ಆದರೆ ನನ್ನ ಸಹಾಯಕ ಛಾಯಾಗ್ರಾಹಕರು ಹತ್ತೇ ತಿಂಗಳಲ್ಲಿ ಕಲಿಯಬಹುದು’ ಎಂದರು.

‘ಡಿಜಿಟಲ್ ಕ್ಯಾಮೆರಾ ಬಂದ ಮೇಲೆ ನಮ್ಮ ಬದುಕು ಸುಲಭವಾಯಿತು. ಆದರೆ, ಬಹುಬೇಗ ಬೋರ್ ಕೂಡಾ ಆಗುತ್ತಿದೆ. ಏಕೆಂದರೆ, ಬಹುತೇಕ ಸಿನಿಮಾಗಳು ಒಂದೇ ತರಹ ಕಾಣಿಸುತ್ತವೆ. ನಾನು ರಾಮ್ ಚರಣ್ ತೇಜಾ ನಟನೆಯ ‘ಪೆದ್ದಿ’ ಸಿನಿಮಾದ ಒಂದು ಭಾಗವನ್ನು ನೆಗೆಟಿವ್ ಫಿಲ್ಮ್ ಬಳಸಿ ಚಿತ್ರೀಕರಣ ಮಾಡಿದೆ. ರಾಮಚರಣ್ ತೇಜಾ ಬಹಳ ಸಂತೋಷ ಪಟ್ಟರು. ನೆಗೆಟಿವ್ ಕ್ಯಾಮೆರಾ ಸದ್ದು ಮರೆತುಹೋಗುತ್ತಿತ್ತು, ಪ್ರಸ್ತುತ ಈಗ ನೆಗೆಟಿವ್ ಕ್ಯಾಮೆರಾ ಮುನ್ನೆಲೆಗೆ ಬರುತ್ತಿದೆ. ಹಾಲಿವುಡ್ ನಲ್ಲಿ ಯೂಟ್ಯೂಬರ್ ಗಳೂ ನೆಗೆಟಿವ್ ಫಿಲ್ಮ್ ಬಳಸುತ್ತಿದ್ದಾರೆ’ ಎಂದು ಹೇಳಿದರು.

‘ಸಿನಿಮಾ ಅನ್ನುವುದು ಹೃದಯಕ್ಕೆ ಹತ್ತಿರವಾದದ್ದು. ತೀವ್ರವಾದ ದೃಶ್ಯಗಳನ್ನು ಕಟ್ಟಿಕೊಡಬೇಕೆಂದರೆ ಎಲ್ಲರೂ ಜೊತೆ ಸೇರಿ ಕೆಲಸ ಮಾಡಬೇಕಾಗುತ್ತದೆ’ ಎಂದು ಹೇಳಿದರು. ಈ ಸಂದರ್ಭದಲ್ಲಿ ಅವರು ‘ದೇವರ’, ‘ವಾರಣಂ ಆಯಿರಮ್’, ‘ರೋಬೋ’, ‘ನೆನೋಕ್ಕಡಿನೆ’, ‘ರಂಗಸ್ಥಳಂ’ ಸಿನಿಮಾಗಳ ದೃಶ್ಯಗಳನ್ನು ಚಿತ್ರೀಕರಿಸಿದ ರೀತಿ ಬಗ್ಗೆ ವಿವರವಾಗಿ ತಿಳಿಸಿದರು. ವಿಎಫ್ಎಕ್ಸ್, ಕಲರಿಸ್ಟ್ ಗಳ ಜೊತೆ ಹೇಗೆ ಕೆಲಸ ನಡೆಯುತ್ತದೆ ಎಂಬುದನ್ನೂ ಹೇಳಿದರು. ಈ ಗೋಷ್ಠಿಯು ನಿಜವಾದ ಅರ್ಥದಲ್ಲಿ ಮಾಸ್ಟರ್ ಕ್ಲಾಸ್ ನಂತೆ ಮೂಡಿಬಂತು.

ಪ್ರಶಾಂತ್ ಪಂಡಿತ್ ಈ ಗೋಷ್ಠಿಯನ್ನು ಸೊಗಸಾಗಿ ನಿರ್ವಹಿಸಿದರು.