ಹಾಸನ: ಹಾಸನ ಬಸ್‌ ನಿಲ್ದಾಣದಲ್ಲಿ ಬಸ್‌ ನಿಲ್ಲಿಸುವ ಸಮಯದ ವಿಚಾರವಾಗಿ ಧರ್ಮಸ್ಥಳ ಮತ್ತು ಮಂಗಳೂರು ಮಾರ್ಗದ ಬಸ್‌ ಚಾಲಕರ ನಡುವೆ ಜಗಳ ನಡೆದ ಘಟನೆ ವರದಿಯಾಗಿದೆ.

  ಮಾಹಿತಿಯ ಪ್ರಕಾರ, ಕೆಎ09-F-5249 ಸಂಖ್ಯೆಯ ಧರ್ಮಸ್ಥಳ ಮಾರ್ಗದ ಬಸ್‌ ಹಾಗೂ ಕೆಎ42-F-2308 ಸಂಖ್ಯೆಯ ಮಂಗಳೂರು ಮಾರ್ಗದ ಬಸ್‌ ನಡುವೆ ಬಸ್‌ ನಿಲುಗಡೆ ಸಮಯದ ವಿಚಾರದಲ್ಲಿ ವಾಗ್ವಾದ ಉಂಟಾಗಿದೆ. ಈ ವೇಳೆ ಚಾಲಕರು ಪರಸ್ಪರ ಮಾತಿನ ಚಕಮಕಿ ನಡೆಸಿದ್ದು, ಮಂಗಳೂರು ಮಾರ್ಗದ ಬಸ್‌ ಚಾಲಕನ ಮೇಲೆ ಬೈಗುಳದ ಆರೋಪ ಕೇಳಿಬಂದಿದೆ.

ನಂತರ ಬಸ್‌ ನಿಲ್ದಾಣದ ಮೇಲಾಧಿಕಾರಿಗಳು ಮಧ್ಯಪ್ರವೇಶಿಸಿ ಇಬ್ಬರ ನಡುವೆ ಸಂಧಾನ ನಡೆಸಿ ಕಳುಹಿಸಿದ್ದಾರೆ. ಬಳಿಕ ಕೆಎ09-F-5249 ಸಂಖ್ಯೆಯ ಬಸ್‌ಗೆ ಸಂಬಂಧಿಸಿದವರು ಕೆಎ05-AG-3616 ಸಂಖ್ಯೆಯ ಶಿಫ್ಟ್‌ ಡಿಸೈರ್‌ ಕಾರಿನಲ್ಲಿ ಬಂದು ಎನ್‌ಎಚ್‌-75 ಹೆದ್ದಾರಿಯಲ್ಲಿ ಮತ್ತೆ ಜಗಳ ನಡೆಸಿದ್ದಾರೆ ಎಂದು ಆರೋಪಿಸಲಾಗಿದೆ.

ಅರಕಲಗೂಡು: ತಾಲ್ಲೂಕಿನ ಹಿರಿಯ ಪತ್ರಕರ್ತರು ಹಾಗೂ ತಾಲ್ಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ ಮಾಜಿ ಉಪಾಧ್ಯಕ್ಷರಾದ ಜಯಕುಮಾರ್ (59) ಅವರು ಹೃದಯ ಸಂಬಂಧಿ ಕಾಯಿಲೆಯಿಂದ ನಿಧನರಾದರು.

ಜಯಕುಮಾರ್ ಅವರು ಜನಮಿತ್ರ ಹಾಗೂ ಸಂಯುಕ್ತ ಕರ್ನಾಟಕ ಪತ್ರಿಕೆಗಳಲ್ಲಿ ಸೇವೆ ಸಲ್ಲಿಸಿ ಪತ್ರಿಕೋದ್ಯಮ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದರು. ಅವರ ನಿಧನದಿಂದ ಕುಟುಂಬಕ್ಕೆ ಮಾತ್ರವಲ್ಲದೆ, ಅರಕಲಗೂಡು ತಾಲ್ಲೂಕಿನ ಪತ್ರಿಕೋದ್ಯಮ ಕ್ಷೇತ್ರಕ್ಕೂ ತುಂಬಲಾರದ ನಷ್ಟ ಉಂಟಾಗಿದೆ.

ತಾಲ್ಲೂಕು ಕಾರ್ಯನಿರತ ಪತ್ರಕರ್ತರ ಸಂಘವು ಅವರ ನಿಧನಕ್ಕೆ ತೀವ್ರ ಸಂತಾಪ ಸೂಚಿಸಿದ್ದು, ಭಗವಂತನು ಅವರ ಆತ್ಮಕ್ಕೆ ಚಿರಶಾಂತಿ ನೀಡಲಿ ಹಾಗೂ ಅವರ ಕುಟುಂಬದವರಿಗೆ ಈ ದುಃಖವನ್ನು ಭರಿಸುವ ಶಕ್ತಿಯನ್ನು ಕರುಣಿಸಲಿ ಎಂದು ಪ್ರಾರ್ಥಿಸಿದೆ.