ಮೈಸೂರು: ನಾಡಹಬ್ಬ ಜಂಬೂ ಸವಾರಿಗೆ ಮೆರುಗು ತರುವ ನಿಟ್ಟಿನಲ್ಲಿ ಈ ಬಾರಿ ೩೧ ಜಿಲ್ಲೆಗಳ ೭೦ಕ್ಕೂ ಹೆಚ್ಚು ಮಾದರಿಯ ಸಂದೇಶ ಸಾರುವ ಸ್ತಬ್ಧಚಿತ್ರಗಳು ಸಾಗಿ ಜನ ಮನಗೆದ್ದವು.
ಬಾಗಲಕೋಟೆಯ ಬಾದಾಮಿ ಚಾಲುಕ್ಯರ ರಾಜವಂಶ ಹಾಗೂ ಶ್ರೀ ಬನಶಂಕರಿ, ಬಳ್ಳಾರಿಯ ಕುಮಾರಸ್ವಾಮಿ ದೇವಾಸ್ಥಾನ ಪಾರ್ವತಿ ದೇವಾಲಯ, ಕಸೂತಿ, ನಾರಿಹಳ್ಳಿ ಅಣೆಕಟ್ಟು, ಬೆಳಗಾವಿಯ ಮಹಾಲಿಂಗೇಶ್ವರ ದೇವಾಲಯ, ಕಿತ್ತೂರುರಾಣಿ ಚೆನ್ನಮ್ಮ ಹಾಗೂ ಸುವರ್ಣಸೌಧ ಹಾಗೂ ಸಂಗೊಳ್ಳಿರಾಯಣ್ಣ ಪ್ರತಿಮೆ, ಬೆಂಗಳೂರು ಗ್ರಾಮಾಂತರದ ನೆಲಮಂಗಲದ ದಕ್ಷಿಣ ಕಾಶಿ ಶಿವಗಂಗೆ ದೇವಾಲಯ, ಬೆಂಗಳೂರು ನಗರದಿಂದ ಚಂದ್ರಯಾನ-೩ ಹಾಗೂ ಕೆಂಪೇಗೌಡರ ಪ್ರತಿಮೆ ಮಾದರಿ, ಬೀದರ್‌ ಜಿಲ್ಲೆಯ ಕೃಷ್ಣಮೃಗ ಸಂರಕ್ಷಾಣಾಧಾಮ ಅರಣ್ಯ ಪ್ರದೇಶ, ಚಾಮರಾಜನಗರದಿಂದ ಜನಪದ ಭಕ್ತಿಯ ಬೀಡು ಹುಲಿ, ಆನೆಗಳ ಸಂತೃಪ್ತಿಯ ಕಾಡಿನ ಅನಾವರಣ. ಚಿಕ್ಕಬಳ್ಳಾಪುರದಿಂದ ಏಕತೆಯಲ್ಲಿ ಅನೇಕತೆ ಸಾರುವ ನಿಟ್ಟಿನಲ್ಲಿ ಹಿಂದೂ, ಮುಸ್ಲಿ ಹಾಗೂ ಕ್ರೈಸ್ತ ಧರ್ಮದ ದೇವಾಲಯ, ಚಿಕ್ಕಮಗಳೂರಿನಿಂದ ಕಾಫಿ ನಾಡನ್ನು ಬಿಂಬಿಸುವ ಬೆಟ್ಟದಿಂದ ಬಟ್ಟಲಿಗೆ ಸಂದೇಶ, ಚಿತ್ರದುರ್ಗದಿಂದ ಶ್ರೀ ಗುರು ತಿಪ್ಪೇರುದ್ರಸ್ವಾಮಿ ದೇವಾಲಯ ಮಾದರಿ, ದಕ್ಷಿಣ ಕನ್ನಡ ಜಿಲ್ಲೆಯಿಂದ ಪಿಲಕುಳ ಗುತ್ತಿಗೆಮನೆ-ವಿವೇಕಾನಂದ ತಾರಾಲಯ- ಬೀಚ್‌ ಸರ್ಫಿಂಗ್‌, ದಾವಣಗೆರೆಯಿಂದ ಸಂತ ಸೇವಾಲಾಲರ ಹುಟ್ಟೂರು ಮತ್ತು ಬಂಜಾರ ಸಂಪ್ರದಾಯ ಬಿಂಬಿಸುವ ಸ್ತಬ್ಧಚಿತ್ರ ಮನಸೂರೆಗೊಂಡಿತು.
ಧಾರವಾಡಜಿಲ್ಲೆಯ ಪೇಡಾ ಹಾಗೂ ಎಮ್ಮೆ ನಮ್ಮ ಹೆಮ್ಮೆ ಎಂಬ ಸಂದೇಶ ಸಾರಿತು. ಗದಗ ಜಿಲ್ಲೆಯಿಂದ ಗಾಂಧೀಜಿಯವರ ಸಬರಮತಿ ಆಶ್ರಮ ಮಾದರಿ, ಹಾಸನ ಜಿಲ್ಲೆಯಿಂದ ಶ್ರೀ ಹಾಸನಾಂಬ ಸಮೂಹ ದೇವಾಲಯ, ಹಾವೇರಿ ಜಿಲ್ಲೆಯಿಂದ ಶಂಕನಾದ ಮೊಳಗಿಸುವ ಶ್ರೀ ಕನಕದಾಸರು ಹಾಗೂ ಕಾಗಿನೆಲೆ ಪೀಠ, ಕಲ್ಬುರ್ಗಿಯಿಂದ ರಾಜವಂಶಸ್ಥರ ಕೋಟೆ ಹಾಗೂ ಅರಣ್ಯ ಪ್ರದೇಶ, ಕೊಡಗು ಜಿಲ್ಲೆಯ ಪ್ರವಾಸಿ ತಾಣಗಳಾದ ತಲಕಾವೇರಿ, ಜಲಪಾತ ಹಾಗೂ ದುಬಾರೆ ಆನೆ ಸಂರಕ್ಷಣೆ ಪ್ರದೇಶ, ಕೋಲಾರದಿಂದ ನರೇಗಾದಡಿಯಲ್ಲಿ ವೀರಗಲ್ಲುಗಳ ಉತ್ಖನನ ಮತ್ತು ಮರುಸ್ಥಾಪನೆ, ಕೊಪ್ಪಳದ ಕಿನ್ನಾಳೆ ಕಲೆ ಮತ್ತು ಕೈ ಮಗ್ಗ, ಮಂಡ್ಯ ಜಿಲ್ಲೆಯ ಸಿಹಿ ಕಬ್ಬಿನ ಆಲೆ ಮನೆ, ಮೈಸೂರಿನಿಂದ ನಾಲ್ವಡಿಯವರ ಕೊಡುಗೆಗಳು, ರಾಯಚೂರಿನಿಂದ ನವರಂಗ ದರ್ಬಾಜ ಹಾಗೂ ಆರ್‌ಟಿಪಿಎಸ್‌, ರಾಮನಗರದಿಂದ ಚೆನ್ನಪಟ್ಟಣದ ಗೊಂಬೆಗಳು ಇತ್ಯಾದಿ, ಶಿವಮೊಗ್ಗ ಜಿಲ್ಲೆಯ ಕುವೆಂಪು, ಕುಪ್ಪಳ್ಳಿ ಹಾಗೂ ಶಿವಪ್ಪನಾಯಕನ ಪ್ರತಿಮೆ, ತುಮಕೂರಿನಿಂದ ಮೂಡಲಕಾಡು ಯಕ್ಷಗಾನ, ಉಡುಪಿಯಿಂದ ತ್ಯಾಜ್ಯಮುಕ್ತ ಮತ್ಸ್ಯಸ್ನೇಹಿ ಸಮುದ್ರ, ಉತ್ತರ ಕನ್ನಡ ಜಿಲ್ಲೆಯ ವನ್ಯಜೀವಿ ಹಾಗೂ ಸಿಂಹದ ಬಾಲದ ಸಿಂಗಳಿಕ ರಕ್ಷಣೆ ಸಂದೇಶ, ವಿಜಯಪುರದ ಶ್ರೀ ಸಿದ್ದೇಶ್ವರ ಸ್ವಾಮೀಜಿಗಳ ಜ್ಞಾನ ಯೋಗಾಶ್ರಮ ಹಾಗೂ ಯಾದವಗಿರಿ ಜಿಲ್ಲೆಯ ವೇಣುಗೋಪಾಲ ಸ್ವಾಮಿ ದೇವಾಲಯ ಮಾದರಿ ಸ್ತಬ್ಧಚಿತ್ರಗಳು ಕಂಡು ಬಂದವು.